మార్కెట్లో డిమాండ్ ఉన్న కోర్సుల్లో యువతకు శిక్షణతో ఉపాధి-కలెక్టర్

నెల్లూరు: మార్కెట్లో డిమాండ్ ఉన్న వృత్తి నైపుణ్య కోర్సుల్లో యువతకు శిక్షణ ఇచ్చి మెరుగైన ఉపాధి అవకాశాలు కల్పించాలని జిల్లా కలెక్టర్ హరినారాయణన్ అధికారులకు సూచించారు. మంగళవారం కలెక్టర్ చాంబర్లో స్కిల్ డెవలప్మెంట్ కార్పొరేషన్ ఆధ్వర్యంలో చేపడుతున్న వృత్తి నైపుణ్య కోర్సులపై సమీక్ష నిర్వహించారు. ఈ సందర్భంగా కలెక్టర్ మాట్లాడుతూ యువతకు ఉపయోగపడే వృత్తి విద్య కోర్సులను ప్రవేశపెట్టేందుకు చర్యలు చేపట్టాలన్నారు. ప్రధానంగా మార్కెట్లో మంచి డిమాండ్ ఉన్న ఏసీ, ఫ్రిడ్జ్ మెకానిక్, ప్లంబింగ్, డ్రైవింగ్, జేసీబీ, క్రేన్ ఆపరేటింగ్, పెయింటింగ్ మొదలైన కోర్సుల్లో యువతకు శిక్షణ ఇచ్చి, ఉపాధి అవకాశాలు మెరుగుపరచాలన్నారు. స్కిల్ డెవలప్మెంట్ ఆధ్వర్యంలో జిల్లాలో నిర్వహిస్తున్న 10 డెవలప్మెంట్ హబ్ లలో ఈ కోర్సులను ఏర్పాటు చేసేందుకు ప్రత్యేక దృష్టి సారించాలన్నారు. ఈ సమావేశంలో జిల్లా స్కిల్ డెవలప్మెంట్ అధికారి వినీల్ కుమార్, డి ఆర్ డి ఏ పీడీ సాంబశివారెడ్డి, గవర్నమెంట్ ఐటిఐ కాలేజీ ప్రిన్సిపాల్ శ్రీ శ్రీధర్ రెడ్డి, జేఈవో భవాని శంకర్ తదితరులు పాల్గొన్నారు.