వేసవి కాలంలో మంచినీటి ఎద్దడి నివారణకు ప్రత్యామ్నాయ ఏర్పాట్లు-కమిషనర్ హరిత

నెల్లూరు: నగర పాలకసంస్థ ఇంజనీరింగ్ విభాగం ఆధ్వర్యంలో జరుగుతున్న వివిధ అభివృద్ధి పనులను కమిషనర్ శ్రీమతి హరిత సమీక్షించారు. కమిషనర్ కార్యాలయంలో మంగళవారం జరిగిన సమావేశంలో రానున్న వేసవి కాలాన్ని దృష్టిలో ఉంచుకుని తీసుకోవాల్సిన ముందు జాగ్రత్త చర్యలు గురించి చర్చించారు. మంచినీటి ఎద్దడి నివారణకు అవసరమైన అన్ని ప్రత్యామ్నాయ ఏర్పాట్లను సిద్ధం చేసుకోవాలని కమిషనర్ అధికారులను సూచించారు. సమీక్షలో భాగంగా ఆర్ధిక సంఘం నిధుల పనుల అభివృద్ధి, పట్టణ ఆరోగ్య కేంద్రాల నిర్వహణ, మన బడి నాడు- నేడు, సాధారణ నిధుల అభివృద్ధి పనులు, కమాండ్ కంట్రోల్ కేంద్రం నిర్మాణ పనులు, నగర వ్యాప్తంగా పచ్చదనం ఏర్పాటు వంటి వివిధ అంశాలపై అధికారులతో చర్చించారు. అభివృద్ధి పనులన్నీ వేగవంతంగా పూర్తయేలా ప్రణాళికలు సిద్ధం చేసుకోవాలని కమిషనర్ సూచించారు. కమాండ్ కంట్రోల్ కేంద్రం ఏర్పాటును అత్యంత ప్రాధాన్యతగా భావించి నిర్మాణ పనులను వేగవంతంగా పూర్తి చేయాలని కమిషనర్ సూచించారు. అన్ని అభివృద్ధి పనులను త్వరితగతిన పూర్తి చేసి ప్రజలకు అందుబాటులోకి తేవాలని కమిషనర్ అధికారులను ఆదేశించారు. ఈ సమీక్షా సమావేశంలో ఇంజనీరింగ్ విభాగం ఉన్నతాధికారులు సంపత్ కుమార్, సంజయ్, చంద్రయ్య, శేషగిరిరావు, సిబ్బంది పాల్గొన్నారు.