ఓటర్ డ్రాఫ్ట్ రోల్ జాబితా విడుదల చేసిన కమిషనర్ వికాస్ మర్మత్
నెల్లూరు: కేంద్ర ఎన్నికల సంఘం ఆదేశాలతో నెల్లూరు నగర పాలక సంస్థ పరిధిలోని సిటీ నియోజకవర్గం- 117, ఓటర్ డ్రాఫ్ట్ రోల్ 2024 లిస్ట్ ను కమిషనర్ వికాస్ మర్మత్ సోమవారం విడుదల చేసారు. కార్యాలయంలో జరిగిన ఈ కార్యక్రమంలో ఓటరు జాబితాను ప్రకటించిన అనంతరం కమిషనర్ మాట్లాడుతూ విడుదల చేసిన ఓటరు జాబితాలను సంబంధిత అన్ని పోలింగ్ స్టేషన్లతో పాటు నగర పాలక సంస్థ కార్యాలయంలో ప్రదర్శనకు ఉంచామని తెలిపారు. BLO.లు నిర్వహణలో ఇంటింటి విచారణ అనంతరం, అన్ని రకాల ఫారంలను క్షుణ్ణంగా పరిశీలించి జాబితాను రూపొందించామని తెలిపారు. వివిధ దరఖాస్తులు ద్వారా అందుకున్న 92500 ఓటర్ల సవరణలను అత్యంత పారదర్శకంగా పూర్తి చేసామని తెలిపారు. నగర వ్యాప్తంగా చేపట్టిన ఓటరు అవగాహనా సదస్సులతో 58000 నూతన ఓటర్ల దరఖాస్తులు అందుకున్నామని, ముగ్గురు ఏ.ఈ.ఆర్.ఓ ల పర్యవేక్షణలో పూర్తి స్థాయిలో విచారణ జరిపి, అర్హులుగా గుర్తించిన వారందరికీ ఓటు హక్కు కల్పించామని తెలిపారు. కుటుంబ సభ్యులైన ఓటర్లందరూ ఒకే పోలింగ్ స్టేషన్ పరిధిలోకి వచ్చేలా జాబితా రూపకల్పనలో జాగ్రత్తలు తీసుకున్నామని కమిషనర్ తెలిపారు. ప్రతీ మంగళవారం రాజకీయ పార్టీల ప్రతినిధులతో సమావేశాన్ని నిర్వహించి ఓటరు జాబితా రూపకల్పన ప్రగతిని వివరిస్తూ వచ్చామని, అభ్యంతరాలను స్వీకరించి, ఎప్పటికప్పుడు జాబితాలో సవరణలు చేశామని కమిషనర్ వెల్లడించారు. ప్రకటించిన నూతన జాబితాను ఓటర్లందరూ పరిశీలించుకుని వివరాలను సరిచూసుకోవాలని కమిషనర్ సూచించారు.